Нэтфликсийн “Бие бялдар Ази” реалити шоуны шилдэг дөрвөн багт БНСУ, Япон, Монгол, Австралийн багууд шалгарлаа.
Японы баг тавдугаар даалгаварт шалгарч цааш финалд өрсөлдөх эрх авсан ба Япон, Монгол, Австралийн багууд шийдвэрлэх тулаанд оролцохоор болов. Үлдсэн гурван баг “Бул эргүүлэх үхлийн тулаан”-д өрсөлдөнө. Монголын багаас улсын арслан Б.Орхонбаяр хоёр эмэгтэй тамирчны хамт хүч үзэх бол БНСУ-ын багт гурван эрэгтэй, Австралийн багт нэг эрэгтэй, хоёр эмэгтэй тамирчин оролцохоор болжээ.
Уг шоуны 10-12 дугаар бүлэг ирэх долоо хоногийн мягмар гараг буюу арваннэгдүгээр сарын 18-нд цацагдаж, ялагчийг тодруулна. Азийн орнуудад үзэлтээрээ дээд амжилт тогтоож байгаа ур чадвар, хүч чадал, ухаан мэдлэг шаардсан “Physical: Asia” шоу нэвтрүүлэг анх удаа монгол хадмалтайгаар гарч эхэллээ. БНСУ-д хүчтэй нөлөөтэй болсон уг шоу анх удаа Азийн найман орны дунд болж байгаагаараа онцлогтой.
Сонирхуулахад, шоуны ялагч багийг нэг тэрбум вонын мөнгөн шагналаар шагнана гэж зохион байгуулагчид зарлаад байгаа билээ.
АНХААРУУЛГА: Уншигчдын бичсэн сэтгэгдэлд манай сайт хариуцлага хүлээхгүй болно. Та сэтгэгдэл бичихдээ бусдын эрх ашгийг хүндэтгэн үзнэ үү.
0 cэтгэгдэлтэй