Их зохиолч, соён гэгээрүүлэгч Д.Нацагдоржийн амьдралын замнал, хэрэглэж байсан эд зүйлсийг цогцоор харуулсан “Чингис хааны удмын бичгийн их хүмүүн Д.Нацагдорж” тусгай үзэсгэлэнг “Чингис хаан” үндэсний музейд нээжээ.
Энэхүү үзэсгэлэнд ШУА-ийн Хэл зохиолын хүрээлэнгээс Д.Нацагдоржийн гар бичмэлийн эх, тэмдэглэлийн дэвтэр, өдөр тутмын ажлын төлөвлөгөө, түүний гэргий Нина Чистяковагийн захидлууд зэрэг олон ховор баримтыг дэлгэжээ. Тухайлбал, түүний хэрэглэж байсан эд өлгийн зүйлс, буу, бичгийн хэрэгсэл зэрэг дурсгалыг Монголын Зохиолчдын Эвлэлээс, ширээ, сандал зэрэг түүхэн хэрэглэгдэхүүн, үнэт үзмэрүүдийг Түүх, угсаатны зүйн хүрээлэн болон “Чингис хаан” үндэсний музейгээс дэлгэжээ. Ийнхүү энэ удаагийн үзэсгэлэн олон байгууллагын сан хөмрөгөөс бүрдэж байгаагаараа онцлог юм.
Үзэсгэлэнгийн үеэр ШУА, Хэл зохиолын хүрээлэнгийн захирал О.Шинэбаяр “Хэл зохиолын хүрээлэнгийн гар бичмэлийн санд 400 гаруй хавтас, 10 мянга гаруй хуудас бүхий үнэт өв бий. Үүний дотор Д.Нацагдоржийн гар бичмэлийн сан хөмрөг онцгой байр суурь эзэлдэг” хэмээн онцолжээ.
Түүнчлэн тэрбээр, “Эдгээр нь үндсэндээ гурван төрөлтэй. Нэгдүгээрт, зохиолчийн өөрийн гараар бичсэн эх гар бичмэлүүд, хоёрдугаарт, шавь нар, нөхөд нь олшруулан түгээх зорилгоор хуулбарлан бичсэн эхүүд, гуравдугаарт, түүний орчуулгын болон судалгааны ажилтай холбоотой гэрэл зураг, хуулбар материалууд юм. Тухайлбал, Карл Марксын “Капитал” зохиолыг орчуулахтай холбоотой 800 гаруй гэрэл зургийн хуулбар материал Хэл зохиолын хүрээлэнд байгаа нь судалгааны нэн үнэ цэнтэй хэрэглэгдэхүүнд тооцогддог” хэмээсэн байна.
Тус үзэсгэлэнг энэ сарын 13-ыг хүртэл олны хүртээл болгох аж.
АНХААРУУЛГА: Уншигчдын бичсэн сэтгэгдэлд манай сайт хариуцлага хүлээхгүй болно. Та сэтгэгдэл бичихдээ бусдын эрх ашгийг хүндэтгэн үзнэ үү.
0 cэтгэгдэлтэй