УИХ-ын 28-р тойргоос сонгогдсон Д.Сумьяабазар гишүүний бүрэн эрхээсээ татгалзаж, Нийслэлийн Засаг даргаар томилогдсоноор тус тойрогт нөхөн сонгууль явуулахаар болсон билээ.
УИХ-ын Төрийн байгуулалтын байнгын хорооны өнөөдрийн хуралдаанаар УИХ-ын сонгуулийн 28 дугаар тойргийн нөхөн сонгуулийн товыг тогтох асуудлыг хэлэлцэхээр товлосон байсан ч УИХ дахь МАН-ын бүлэг уг асуудлыг хэлэлцэхийг хойшлуулах горимын санал гаргав.
МАН-ын бүлгийн дарга Д.Тогтохсүрэн:
-“УИХ-ын сонгуулийн 28 дугаар тойргийн нөхөн сонгуулийн асуудлыг өнөөдөр хэлэлцүүлэхээр оруулсан байна. Сонгуулийн тухай хуулиар орон гарсан тохиолдолд 50 хоногийн дотор шийдвэрлэхээр байгаа. Энэ хугацаа арванхоёрдугаар сарын 13-нд байгаа. Энэ асуудлын бэлтгэл хангагдаагүй байна. Улс төрийн асуудал учраас тодорхой хүрээнд ярих, зардлын тооцоог бэлтгэх ажлууд байгаа учраас өнөөдрийн хэлэлцэх асуудлаас нэг долоо хоногоор хойшлуулж өгнө үү гэдэг горимын санал гаргаж байна” гэснээр УИХ-ын сонгуулийн 28 дугаар тойрог буюу нийслэлийн Сонгинохайрхан дүүргийн нөхөн сонгуулийн товыг тогтох асуудлыг ирэх долоо хоногт хэлэлцэхээр болов.
АНХААРУУЛГА: Уншигчдын бичсэн сэтгэгдэлд манай сайт хариуцлага хүлээхгүй болно. Та сэтгэгдэл бичихдээ бусдын эрх ашгийг хүндэтгэн үзнэ үү.
0 cэтгэгдэлтэй