Орон нутгийн сонгуулийн тов хэдийнэ зарлагдаж, намууд нэр дэвшигчдээ зарласан хэдий ч дайны өмнөх нам жим гэдэг шиг ажин түжин, бараг сонгуулийн дүн тодорхой болсон ч юм уу гэмээр.
УИХ-ын сонгуульд хол зөрүүтэй ялагдсан АН үүрдийн дайсан мэт байсан МАХН, үүрэн дотроос нь бэлтрэг суйлсан ШИНЭ намтайгаа эвссэнд дэмжигчид нь ч гайхаж ядаж байгаа. Дотооддоо ч эв түнжингүй байгаа АН УИХ-д үнэмлэхүй олноор аархаж байгаа МАН-ын хувьд “үдийн будаа” болсон гэх таамаглагчид олон.
Угаасаа НИТХ-ын 45 төлөөлөгчийн 34 нь МАН. Дээр нь нийслэлд туг болж байсан буурал дарга УИХ-д өвдөг шороодон, нийслэлд нэр дэвшихгүй нь тодорхой болсон. 11 хэн гишүүний нэг АН-ын генсекээр ажилласан Ц.Баатархүү нэр дэвшихгүй гэдгээ илэрхийлсэн.
Гэсэн хэдий ч сонгууль юм бол сонголттой байх ёстой. Сонгууль болгонд хоёр том намын аль нэгтэй нь наймаалцаж оролцдог жижиг намуудыг орхиё гэхэд бие даагчид энэ удаагийн НИТХ-ийн сонгуулийг сонирхохгүй байгаа нь ч сонирхолтой.
Уг нь УИХ-ын сонгуулийн тоос арилаагүй шахам байхад 60 гаруй бие даагчид нэгдэн НИТХ-д өрсөлдөнө гэлцэж байсан. Гэвч энэ удаагийн НИТХ-ын сонгуульд гурван бие даагч л өрсөлдөхөөр тунаж үлджээ.
Яагаад гуравхан гэж…? Хууль тогтоох дээд байгууллага УИХ-д бие даан нэр дэвшигч “хүч” сульддаг ч орон нутгийн өөрөө удирдах байгууллагад бие даагчдын хүч, оролцоо чухал баймаар.
УИХ-ын сонгуульд чихэлдээд байсан бие даагчид хаачив, ингэхэд???
А.АНУ
АНХААРУУЛГА: Уншигчдын бичсэн сэтгэгдэлд манай сайт хариуцлага хүлээхгүй болно. Та сэтгэгдэл бичихдээ бусдын эрх ашгийг хүндэтгэн үзнэ үү.
0 cэтгэгдэлтэй