Ц.Гансүлд: Л.Оюун-Эрдэнэд холбогдуулж нийт 4 хэрэгт хэрэг бүртгэл нээж, мөрдөн шалгах ажиллагаа явуулж байгаа

Нийслэлийн прокурорын газрын Нэгдүгээр хэлтсийн дарга, ахлах прокурор Ц.Гансүлд өнөөдөр цаг үеийн асуудлаар мэдээлэл хийлээ. Энэ үеэрээ тэрбээр Ерөнхий сайд асан УИХ-ын гишүүн Л.Оюун-Эрдэнийг хэд хэдэн хэрэгт шалгаж байгаа тухай мэдээллээ.

Ц.Гансүлд “УИХ-ын гишүүн Л.Оюун-Эрдэнэтэй холбогдуулан нэр бүхий хэд хэдэн иргэнээс гэмт хэргийн гомдол, мэдээлэл гаргасан. Уг гомдол, мэдээлэлд дурдсан асуудал тус бүрийг Эрүүгийн хуулийн тусгай ангийн 22.3-т заасан улс төрд нөлөө бүхий этгээд албан тушаалын байдлаа урвуулан ашиглах, мөн 18.6-д заасан мөнгө угаах гэмт хэрэгт холбогдуулан хэрэг бүртгэлтийн хэрэг нээн шалгаж байна.

Улс төрийн нөлөө бүхий этгээдүүдтэй холбоотой хэд хэдэн хэргийг Авлигатай тэмцэх газраас нээн шалгаж, зарим нэр бүхий УИХ-ын гишүүдийг яллагдагчаар татан мөрдөн байцаалтын ажиллагааг үргэлжлүүлэн явуулж байна. Тухайн гэмт хэргийн талаар ирүүлсэн гомдол мэдээлэлтэй холбогдуулан Б.Баатарыг мөн шалгаж байгаа. Ер нь УИХ-ын гишүүн Л.Оюун-Эрдэнэд холбогдуулж нийт дөрвөн хэрэгт хэрэг бүртгэл нээж, мөрдөн шалгах ажиллагаа явуулж байгаа” гэж мэдэгдэв.