“Найрамдлын эрдэнэс” зуслангийн үйл ажиллагааг зогсоож, 6-р ээлжийн хөтөлбөрийг цуцалжээ

“Эрдэнэт” үйлдвэрийн дэргэдэх “Найрамдлын эрдэнэс” зуслангийн үйл ажиллагааг долоодугаар сарын 17-ны өдрөөс эхлэн зогсоож, зургаадугаар ээлжийн хөтөлбөрийг цуцаллаа. Тус зуслангийн  тавдугаар ээлжинд ирсэн 322 амрагч хүүхдүүдээс өндөр халуурах, гэдэс гүйлгэх, толгой эргэх зэрэг шинж тэмдэг илэрсэн тул эмнэлгийн тусламжийг хүргэсэн байна.

Булган аймгийн эрүүл мэндийн газраас гаргасан “Халдвар хамгааллын хариу арга хэмжээ авах баг”, Орхон аймгийн БОЭТ зэрэг газраас өгсөн чиглэлийн дагуу амрагч хүүхдүүдийг хуваарилан эмчилгээнд хамруулж эхэлжээ. Нийт 322 хүүхдээс эцэг, эхийн хүсэлтээр 111 нь гэртээ харьжээ. Үлдсэн хүүхдүүдийг Орхон аймгийн БОЭТ, “Эрдэнэт сувилал” цогцолбор болон “Эрдэнэт медикал” эмнэлэгт хэвтүүлэн эмчилж байна.