АНУ-ын иргэн Роберт Превост Ромын шинэ папаар сонгогдлоо

Пап лам агсан Францисын залгамжлагчийг сонгох чуулганд 70 гаруй орноос цугласан 80-аас доош насны 133 кардинал оролцож, нууц санал хураалтаар дараагийн папыг сонголоо.

Шинэ пап сонгогдохын тулд кардиналуудын 2/3-ынх нь буюу багадаа 89 санал авах ёстой. Тэгвэл АНУ-д төрсөн Роберт Францис Превост дэлхийн католик шашинтнуудын тэргүүнээр сонгогдов. 1955 онд Чикаго хотноо испани болон франц-итали гаралтай гэр бүлд төрсөн Превост 1977 онд Пенсильванийн Виллановагийн их сургуулийг математикч мэргэжлээр төгссөн. Мөн Чикагогийн Католик шашны теологийн холбоонд шашны чиглэлээр суралцжээ. 1982 онд Перу дахь католик шашны номлолд үйлчлэхээр илгээгдэхээсээ өмнө Ром дахь Гэгээн Томас Аквинскийн их сургуульд хуулийн ухааны докторын зэрэг хамгаалсан. 2014 оны арваннэгдүгээр сард Чиклайо хотын хамбаар томилогдохоосоо өмнө Перугийн гурав дахь том хот болох Трухильо дахь семинарт шүүх, ёс суртахууны хуулийн профессороор олон жил ажилласан байна.

Роберт Превост Гэгээн ширээт хамбын суудлыг Лео XIV нэрээр хүлээн авч байна. Пап ламын хувиар олон нийтэд хандаж хэлсэн анхны үгэндээ тэрээр өөрийгөө августин лам гэж танилцуулсан. Энэ нь Гэгээн Августинийн сургаалыг дагаж мөрдөн, сүмийн оюун санааны нийгэмлэгт хайр, эв найрамдал, даруу байдал, өөрийгөө зориулахыг чухалчилдаг санваартнуудыг тодорхойлдлог нэр томъёо юм. Өмнөх 266 папаас 34 нь августин санваартан байжээ.