Ирэх сарын нэгнээс иргэд нийтийн тээврээр 1000 төгрөг төлж зорчино

Өнгөрсөн хоёрдугаар сард НИТХ-аас  тогтоол гаргаж, нийтийн тээврээр үйлчлүүлэх үнийн тарифт зарим өөрчлөлтийг оруулсан. Энэ дагуу нэгдүгээр сарын 1-ээс иргэд 1000 төгрөг төлж, хугацаа хамаарахгүй дөрвөн удаа зорчих байв. Гэвч программ хөгжүүлэлтийн ажил хараахан дуусаагүй байгаа учраас түр хугацаагаар хойшлуулсан.

Тэгвэл ирэх сарын 1-ээс буюу энэ бямба гарагаас тус шийдвэр хэрэгжиж, иргэд нийтийн тээврээр 1000 төгрөг төлж зорчихоор болжээ. Харин үүнд Чингис хаан олон улсын нисэх буудал руу явдаг X:19, X:20 чиглэл хамаарахгүй аж. Хүүхэд 200 төгрөгөөр зорчих юм. Чиглэлийн тарифыг 1 удаа төлж зорчсоноор 3 удаа дамжин суух боломжтой ба автобуснаас буух бүрдээ төхөөрөмжид Umoney картаа дарснаар дамжин суух хөнгөлөлтийг эдэлнэ гэдгийг Нийтийн тээврийн бодлогын газраас мэдээлэв.

Үүнд хугацаа хамаарахгүй. Харин өдөрт дөрвөөс дээш удаа  зорчих бол 1000 төгрөг нэмж төлнө. Оюутнууд ч мөн 1000 төгрөг төлж автобусаар зорчино. Учир нь Боловсролын тухай хуульд өөрчлөлт оруулах үеэр оюутнуудын хөнгөлөлттэй зорчдог зохицуулалтыг хүчингүй болгосон юм байна.