Сургууль, цэцэрлэгүүд 3-р сарын 2 хүртэл хичээллэхгүй

Улсын Онцгой комисс /УОК/ -ын хуралдаанаас сургууль, цэцэрлэгийг ирэх гуравдугаар сарын 2 хүртэл хаах шийдвэрийг гаргалаа. Энэ шийдвэрийг ирэх долоо хоногийн даваа гараг буюу нэгдүгээр сарын 27-оос эхлэн улс даяар мөрдөхөөр хугацаа заажээ. Гэхдээ энэ шийдвэрийг Засгийн газрын хуралдаанаар оруулж, эцэслэн шийдвэрлэх юм байна.

Монгол Улсад коронавирүс илрээгүй ч урьдчилан сэргийлэх, ханиад томууны үеийн эрсдлийг бууруулах үүднээс УОК дээрх шийдвэрийг гаргажээ. Энэ шийдвэрийг ерөнхий боловсролын сургуулиуд өмчийн хэлбэр үл харгалзан мөрдөнө.

Улсын онцгой комиссын шийдвэрийн талаар ЭМ-ийн сайд Д.Сарангэрэл “ДЭМБ-ын Номхон далайн бүсийн ерөнхий захирал Такиши Касайтай албан ёсны ярилцлага хийлээ. Өнөө өглөөний 10.30 цагт БНХАУ-д коронавирүсийн халдвар 844, нас баралт 25 болсон тухай мэдээлэл өгсөн. Тэгвэл сая Улсын онцгой комисс хуралдаж байхад халдварын тохиолдол 887, нас баралт 26 болсон байна. Бид Хятад улстай хиллэдэг учир эрсдэл өндөр. Дээр нь томуугийн тархалт өндөр байна. Амбулаторийн үзлэгийн 9.5 хувийг эзэлж байна.

10 хувь хүрвэл тодорхой хэмжээний хязгаарлалт хийх дүрэмтэй. Томуугийн дэгдэлттэй байгаа энэ үед коронавирүсийн эрсдэл орж ирвэл хүүхэд төдийгүй хүн амын эрүүл мэнд, амь насанд эрсдэл учрах аюултай учир Улсын онцгой комисст ЭМЯ-аас гурван санал орууллаа. 

ЭМЯ-аас:
1-рт, Сургууль цэцэрлэгийг 3-р сарын 2-ныг хүртэл хаах
2-рт, Эм тариа бусад нөөц бүрдүүлэх төсвийг шийдвэрлүүлэх
3-рт, Урд хөрштэй хиллэдэг хилийн боомтуудын хөдөлгөөнийг тодорхой хугацаагаар хязгаарлах тухай саналыг Улсын онцгой комисст орууллаа” гэжээ.