Төрийн тахилгатай Хөвсгөл нуурын их цэвэрлэгээний аян хоёр сар үргэлжилнэ 

Ерөнхийлөгчийн санаачилгаар Хөвсгөл нуурын их цэвэрлэгээний аяныг  энэ сарын 22-оос наймдугаар сарын 13-ны өдрийг хүртэлх хугацаанд зохион байгуулж, нуурын эргэн тойрныг иж бүрэн цэвэрлэхээр болжээ.

Энэ талаар ЕТГ-ын дэд дарга Э.Золбоо “Монгол Улсын төрийн тэргүүн байгаль орчноо хамгаалах чиглэлд онцгой анхаарч, олон ажил хэрэгжүүлж байгаа. Үүний хүрээнд 2022 оноос хойш тус нуурын эргэн тойрныг цэвэрлэх, ойн сан газрын нөхөн сэргээлтийг хийх, нуурт живсэн 11 автомашин, 50 тонн бензин, шатахууныг татан гаргасан.

Энэ жил Монгол Улсын Ерөнхийлөгч Хөвсгөл нуурыг төрийн тахилгатай нуур болгох шийдвэр гаргасан. Энэ нь төр Хөвсгөл нуураа хамгаалалтад авч, онцгой ач холбогдол өгч байгаа хэлбэр. Үүний дагуу энэ жилийн зургаадугаар сарын 22-оос наймдугаар сарын 13-ныг хүртэл нуурын эргэн тойрныг иж бүрэн цэвэрлэх хоёр сарын аян зарлаж байна.

Хөвсгөл нуураас Эгийн гол эх авдаг. Тиймээс энэ орчмын 800 орчим км газар нутгийг цэвэрлэнэ. Цэвэрлэгээний ажилд төрийн болон төрийн бус байгууллагад, нутгийн иргэд гээд 1000 орчим хүний бүрэлдэхүүн оролцоно” гэж мэдээллээ.