“Глоб кредит” хадгаламж зээлийн хоршоог үүсгэн байгуулагч Ж.Мэндбаяр төрөөс 50 тэрбум төгрөг нэхэмжилнэ гэдгээ мэдэгдлээ.
Мэдээлэл хийх үеэрээ тэрбээр “19 жилийн өмнө Глобын хөрөнгийг үнэлүүлэхээр тухайн үеийн Нийслэлийн Засаг даргын Тамгын газраас үнэлгээний комиссыг байгуулсан. Энэ үнэлгээний комисс 1462 нэр төрлийн 30 мянган эд хөрөнгийг 4.3 тэрбум гэж тооцон үнэлсэн. Шүүх энэ үнэлгээг тооцож надад ял оноосон. Нийт хохирлын хэмжээг 11.8 тэрбум гэж тооцоод, нийт хөрөнгө нь 4.3 тэрбум үлдсэн мөнгийг энэ нөхөр идсэн гэж надад 10 жилийн хорих ял оноосон.
Би 2015 онд шоронгоос гарч ирснийхээ дараа хөрөнгө үнэлсэн асуудлаар Захиргааны хэргийн шүүхэд хандсан. Шүүхээс хөрөнгийг дахин үнэлүүлэхэр шинжээч томилсон. Би хөрөнгүүдээс тавыг сонгоод үнэлүүлэхэд 9.2 тэрбум болсон. Улаанбаатар хотын захирагчийн байгуулсан үнэлгээний комиссын үнэлгээнээс даруй хоёр дахин өндөр үнээр үнэлэгдсэн. Дээрх эд хөрөнгө 2015 оны ханшаар 21 тэрбумын үнэлгээтэй болохыг тогтоож өгсөн. Эд хөрөнгийг нөхөж үнэлээгүй хөрөнгө ч бий. Эдгээрийг өнөөгийн ханшаар тооцвол 50, 60 тэрбумд хүрнэ.
Захиргааны хэргийн шүүх Нийслэлийн Засаг даргын Тамгын газраас томилсон үнэлгээний комиссын үнэлгээг хүчингүйд тооцсон. Одоо бид Иргэний шүүхэд хандаж гомдол гаргана. Хохирогчид болон миний бие төрөөс 50 тэрбумыг нэхэмжилнэ” гэв.
АНХААРУУЛГА: Уншигчдын бичсэн сэтгэгдэлд манай сайт хариуцлага хүлээхгүй болно. Та сэтгэгдэл бичихдээ бусдын эрх ашгийг хүндэтгэн үзнэ үү.
0 cэтгэгдэлтэй