Хан-Уул дүүргийн LC tower хотны байранд МУГТ Б.Наранбаатар, С.Эрдэнийн хүү Э.Энхтөгс болон иргэн Ж.Энхжаргалан нарын долоон иргэн мөрийтэй тоглоом зохион байгуулсан, мөн тухайн газраас мансууруулах төрлийн бодис хураан авсан гэх мэдээлэл өчигдөр гарсан. Харин иргэн Ж.Энхжаргалан “өөр дээр нь гүйцэтгэх ажиллагаа” явуулсан гэж мэдээлсэн юм.
Энэ хэргийн талаар иргэн Ж.Энхжаргалан, Б.Наранбаатар нар өнөөдөр өмгөөлөгчийн хамт хэвлэлийн бага хурал хийлээ.
Иргэн Ж.Энхжаргалан “Гэртээ харих замдаа найзынхаа дуудсан газар очсон. Очоод ажил төрлөө ярьж дуусаад тэнд байсан найзуудын хүрээнд 13 тоглосон. Тэр газар мөрийтэй тоглоомны газар биш айл байсан. Цагдаа нар ямар ч зөвшөөрөл харуулалгүй, шууд дайрч орж ирж тэнд байсан 7 хүнийг хана руу харуулж зогсоосон. 3-4 цаг орчим болсон. Бүгдийнх нь гар утсыг хураасан. Тэгээд шууд нэг нэгээр нь хажуу өрөө авч орж, шууд тулгасан асуулт асуусан. Байранд бүтэн нэгжлэг хийж, эмийн сан олсон. Түүнээс гарсан тариурыг “энэ юу вэ” гэж асуусан. Тэнд байсан залуусаас бүгдээс нь хар тамхины тест авсан. Ямар ч хар тамхи илрээгүй. Хэвлэлээр гарч байгаа шиг “кашиш” гэдэг хар тамхи гарч ирсэн зүйл байхгүй. Тэр үед тийм зүйл болоогүй. Мөн хэвлэлээр гарч байгаа шиг мөрийтэй тоглоогүй. Бид найзындаа цуглаад хөзөр тоглосон. Энэ үнэн. Харин хар тамхи дээр санал огт нийлэхгүй.
Цагдаагийн алба хаагчид шууд тулгасан, үнэнээ хэл мөрийтэй тоглосон уу гэж. Тэр хэвлэлээр гараад байгаа зурагнууд мөрдөгч нарын гар утсаар дарсан зураг. Биднийг зохион байгуулалттайгаар мөрийтэй тоглоом, хар тамхины хэрэгт унагах гэж оролдож байна.
Мөн хэвлэлүүдийг биднээс уйчлалт гуйх ёстой гэж бодож байна. Хэрэв үнэхээр тэр газраас хар тамхи олдсон бол мөрдөгч нар үйл ажиллагааны 24 цагийн тасралтгүй хийсэн бичлэгээ ил тавь гэж шаардаж байна.
Бид хана руу хараад зогсож байсан. Тэнд мөрдөгч нар кармаанаасаа гаргаад тавьсан бол яах юм. Бидний нэр төрд халдаж байна. Нийгэмд нэгэнт биднийг харуулсан. Үнэхээр бидний буруу байсан бол шүүхээр шийдэгдсэний дараа зарлах хэрэгтэй. Энд процессийн маш олон алдаа гарсан. Нотлогдоогүй, анхан шатны хэргээр залуусыг ингэж сошил дээр яллаж болохгүй. Энэ бол 100 хувийн гүйцэтгэх ажиллагаа байсан гэдгийг хэлье” гэлээ.
Харин түүний өмгөөлөгч “Хэрэг бүртгэл, мөрдөн байцаалтын ажиллагаа нь нууц байдаг. Үүнийг хэвлэх, хувилах хуулийн хүрээнд хориотой байдаг. Өмгөөлөгч хүртэл хэргийн материалтай танилцахдаа нууц задруулахгүй гэж гарын үсэг зурдаг” гэлээ.
АНХААРУУЛГА: Уншигчдын бичсэн сэтгэгдэлд манай сайт хариуцлага хүлээхгүй болно. Та сэтгэгдэл бичихдээ бусдын эрх ашгийг хүндэтгэн үзнэ үү.
0 cэтгэгдэлтэй