Пүрэв гарагт НҮБ-ын хүний эрхийн зөвлөлийн шинэ гишүүн орнуудыг тодруулах нууц санал хураалтыг ерөнхий ассамблейн чуулганы үеэр зохион байгуулжээ.
Нэрээ дэвшүүлсэн улсуудаас Алжир, Бангладеш, Бельги, Чили, Коста-Рика, Гүрж, Киргизстан, Мальдив, Морокко, Румын, Өмнөд Африкийн БНУ, Вьетнам гэсэн 12 улс НҮБ-ын гишүүн орнуудаас хамгийн олон санал авснаар зөвлөлд сонгогдсон байна.
Өмнөд Солонгос, Венесуэл улсууд зөвлөлд дахин сонгогдохоор нэрээ дэвшүүлсэн ч хангалттай санал авч чадалгүй хасагджээ.
Дэлхий дахинд хүний эрхийг хамгаалах, сайжруулах үүрэгтэй зөвлөл нь НҮБ-ын гишүүн орнуудын нууц санал хураалтаар сонгогдсон 47 улсаас бүрддэг. Төв нь Швейцарын Женев хотод байрладаг юм.
Гишүүн орнуудын тоог бүс нутаг бүрт квотоор хуваарилсан байдаг. Тухайлбал Африкийн орнууд 13, Ази, Номхон далайн орнууд 13, Зүүн Европ 6, Латин Америк болон Карибын орнууд 8, Баруун Европ болон бусад орнууд 7 квоттой байдаг.
Өчигдөр нэрээ дэвшүүлсэн орнуудаас Өмнөд Африкийн БНУ хамгийн олон буюу 182 саналаар сонгогджээ.
Ази, Номхон далайн орнуудаас Бангладеш 160, Мальдив 154, Вьетнам 145, Киргизстан 126, Өмнөд Солонгос 123, Афганистан 12, Бахрейн 1, Монгол 1 санал тус тус авсан байна.
Зөвлөлийн шинэ гишүүн орнууд 2023 оны нэгдүгээр сарын 1-ээс эхлэн гурван жилийн хугацаатай сонгогдож байгаа. Гишүүн орнууд дахин нэг удаа үргэлжлүүлэн нэрээ дэвшүүлэх хязгаартай байдаг аж.
Эх сурвалж: UN.org
АНХААРУУЛГА: Уншигчдын бичсэн сэтгэгдэлд манай сайт хариуцлага хүлээхгүй болно. Та сэтгэгдэл бичихдээ бусдын эрх ашгийг хүндэтгэн үзнэ үү.
0 cэтгэгдэлтэй