2020 онд Бангкокт болсон улс төрийн жагсаалд ягаан өнгийн торгон даашинз өмсөж оролцсон 25 настай Жатупорн Саеоюнг гэх эмэгтэйд холбогдох шүүх хурал даваа гарагт болжээ.
Улсынхаа хатныг дуурайж, ихэс дээдсээ доромжилсон хэрэгт буруутгагдсан түүнд хоёр жилийн хорих ял оноох шийдвэр гаргасныг олон улсын хүний эрхийг хамгаалагчид шүүмжилж байна.
Жатупорн өөрийг нь буруутгасан энэ хэргийг эрс няцааж хатныг дуурайж хувцаслаагүй зөвхөн үндэсний хувцсаа өмссөн хэмээн мэдүүлжээ.
Тайланд улс хаант засаглалыг нь доромжилж, шүүмжлэхийг хуулиараа хатуу хориглодог. Жатупорн хоёр жилийн өмнө болсон жагсаалын үеэр хатны өмсдөг шиг ягаан торгон даашинз өмсөн, шүхэр барьсан үйлчлэгчийг дагалдуулан улаан хивсэн дээгүүр алхаж жүжиглэсэн юм.
Тухайн үед хаант засаглалын үйл ажиллагааг шүүмжилсэн улаан хивсний жагсаал хааны охидын нэгнийх нь зохион байгуулж байсан загварын шоутай зэрэгцэн болж байсан юм.
Эх сурвалж: Eagle.mn
АНХААРУУЛГА: Уншигчдын бичсэн сэтгэгдэлд манай сайт хариуцлага хүлээхгүй болно. Та сэтгэгдэл бичихдээ бусдын эрх ашгийг хүндэтгэн үзнэ үү.
0 cэтгэгдэлтэй