“Тамирчны алдар” дууны эзэн, олимпийн хүрэл медальт, боксчин Н.Энхбат таалал төгсчээ

Сөүл-1988 зуны олимпийн хүрэл медальт, гавьяат тамирчин Н.Энхбат таалал төгсчээ. Тэрээр 1962 оны гуравдугаар сарын 19-нд Улаанбаатар хотод төрсөн. 1979 онд Нийслэлийн 10 жилийн хорьдугаар дунд сургууль, 1985 онд Монгол Улсын Их Сургуулийн эдийн засгийн ангийг тус тус төгсчээ.

1979-1989 онд үндэсний шигшээ багийн тамирчин, 1989-1993 онд спорт сургалтын төв, үндэсний шигшээ багийн дасгалжуулагч, 1999-2001 онд Монголын Үндэсний Олимпийн Хорооны ахлах мэргэжилтнээр ажиллаж байсан. Нийт 312 тулаанд оролцож 240 ялалт байгуулсан.

 “Тамирчны алдар” дууг “Чингис хаан” хамтлаг түүнд зориулан бүтээж байсан юм.

Амжилтын товчоон:

•  1984 онд Куба улсад болсон Найрамдал 84 тэмцээнд аваргын төлөө Кубын нэрт боксчин олимпийн хошой аварга А.Эррерад 2:3 оноогоор хожигдож мөнгөн медаль авсан.
• Бүгд Найрамдах Ардчилсан Герман Улсын Халле хотод болдог байсан Химийн цом олон улсын тэмцээний 2 алт (1983, 1986), 1 мөнгө (1985), Румын улсын Бухарест хотноо болдог Алтан бүс олон улсын тэмцээний 2 алт (1984, 1986), 1 мөнгөн (1983) медальтай.
• ЗХУ, Бүгд Найрамдах Ардчилсан Солонгос Ард Улс, Бүгд Найрамдах Солонгос Улсад болсон олон улсын тэмцээний аварга, Улаанбаатар хотноо болдог Интернациональ, Улаанбаатарын цом тэмцээнүүдийн аварга, Монгол улсын 6 удаагийн аварга (1982-1987), Монголын бүх ард түмний VII спартакиадын аварга, ЗХУ-ын Бүх ард түмний спартакиадын хүрэл медальтай
•  1986 онд Москва хотод болсон сайн санааны тоглолтын хүрэл медальтай.
•  1987 онд Кувейт улсын Эль-Кувейт хотод болсон Ази тивийн аварга шалгаруулах тэмцээнээс мөнгөн медаль авсан.
• 1988 онд Сөүлийн Олимпиос боксын 60 кг-ын жинд хүрэл медаль хүртсэнээр уг олимпоос Монголын багийн авсан цорын ганц медалийн эзэн болсон. Олимпийн тэмцээнд эхний тойрогт хийлж дараа нь Унгарын тамирчин И.Туруг хожоод шөвгийн наймд Мароккогийн боксчин Х.Маржуанег 5:0 харьцаагаар илт давуу ялж хүрэл медалийн болзол хангаад мөнгөн медалийн төлөө Шведийн Г.Крамнед тэнцүү тоглолтоос 2:3 оноогоор хожигджээ.
•  1989 онд БНХАУ-ын Бээжин хотод болсон тэмцээнд 63.5 кг-ын жинд Ази тивийн аварга болсон.
• Дэлхийн шилдэг боксчдын жагсаалтанд жингийнхээ 3-7 дугаар байрт нийтдээ 7 удаа бичигдсэн.

Талийгчийн гэр бүл, төрөл төрөгсдөд гүн эмгэнэл илэрхийлье.