Л.Энх-Амгалан: Эрдэнэт, Дархан-Уул, Өмнөговьд МУИС, ШУТИС, ХААИС-ийг байгуулна

2021-10-20 1234 0

Засгийн газрын өнөөдрийн хуралдаанаар Их, дээд сургуулийг орон нутагт хөгжүүлэх талаар хэлэлцэж, шийдвэрээ гаргалаа. 

Энэ талаар Боловсрол, шинжлэх ухааны сайд Л.Энх-Амгалан мэдээлэл өглөө.

Тэрээр “Засгийн газраас их, дээд сургуулиудыг орон нутагт сургалт, эрдэм шинжилгээ, үйлдвэрлэлийн цогцолбор болгон хөгжүүлэх тогтоолыг албажуулан гаргалаа.

Их, дээд сургуулиудыг орон нутагт хөгжүүлэх нь нийслэлд үүсээд байгаа түгжрэлийг бууруулахаас гадна хөдөө бүс нутгийн хөгжилд нөлөөлөх юм.

Өмнө нь Улаанбаатар хотод байгаа их, дээд сургуулиудын салбарыг аймгуудад байгуулах, нүүлгэх тогтоол гарч байсан ч бодитоор хэрэгжээгүй.

Өнөөдрийн байдлаар Монгол Улсад 88 их, дээд сургуульд 158 мянган оюутан суралцаж байна. Үүнээс 143 мянга нь буюу 92 хувь нь Улаанбаатар хотод суралцаж байгаа бол нийт оюутны 5 хувь нь хөдөө байгаа найман их, дээд сургууль суралцаж байгаа юм.

Мөн цаашид хөдөө орон нутагт их дээд сургуулийг хөгжүүлбэл боловсролын чанарт анхаарах зайлшгүй шаардлагатай. Эрдэнэт, Дархан-Уул, Өмнөговьд сургалт судалгаа үйлдвэрлэлийн цогцолбор бий болгож МУИС, ШУТИС, ХААИС-ийг байгуулах шийдвэр гарч байна. Ингэхдээ салбарыг биш төв сургуулиудыг байгуулах шийдвэр юм. 

Шинээр барилга барихгүй бөгөөд тухайн аймгуудад байгаа барилга байгууламж, дотуур байр, хичээлийн байруудыг ашиглаж өргөтгөл хийх замаар сургалт судалгааны цогцолборыг байгуулна.

Мөн ирэх оноос мэргэжлийн боловсролын төв нь Боловсрол, шинжлэх ухааны яамны харьяанд ирж байгаа. Тиймээс Өмнөговь, Эрдэнэт, Дархан-Уулд сургалт судалгааны цогцолборыг Ахлах сургуулийн төрөлжсөн сургууль, Мэргэжлийн сургалт үйлдвэрлэлийн төв, Их, дээд сургууль гэж төрөлжсөн хэлбэрээр зохион байгуулах шаардлагатай байна.

Эдгээр аймагт заах сургалтын хөтөлбөр Улаанбаатар хотод давхцахгүй. Ингэснээр 10-15 мянган оюутан орон нутагт суралцах боломжтой болно.

Харин багш нарт орон нутагт ажилласны нэмэгдэл бий болно. Мөн ирэх оноос хөдөө орон нутагт ажиллаж байгаа багш нарын нийгмийн асуудлыг шийдвэрлэж, цалин урамшууллыг нэмэх, оюутнуудад тэтгэлэг олгож дэмжих шийдвэр гаргалаа” гэв.

АНХААРУУЛГА: Уншигчдын бичсэн сэтгэгдэлд манай сайт хариуцлага хүлээхгүй болно. Та сэтгэгдэл бичихдээ бусдын эрх ашгийг хүндэтгэн үзнэ үү.

Холбоотой мэдээ

А.Уламсайхан хүү малчны хотноос гадаадад суралцах тэтгэлгийн эзнээр тодорлоо

Монгол Улсын Ерөнхийлөгчийн нэрэмжит тэтгэлэг эзэддээ хүрч эхэлжээ. Тухайн жилийн элсэлтийн ер

2021-12-01

“Мобиком” ХХК “том толгойлсон”-оос болж Баянхонгор аймаг 12 минутын турш цахилгаангүй болжээ

“Мобиком” ХХК “том толгой” гаргаснаас болж бүхэл бүтэн аймаг 12 минутын турш цахилгаан эрчим хүчгүй

2021-11-29

ЗТХЯ: Төмөр замын тээврийг зогсоосонтой холбогдуулан боомтын зөвлөл хуралдана

Хятадын тал Эрээний боомтын төмөр замын тээврийг тодорхойгүй хугацаагаар зогсоох шийдвэр гарсан тал

2021-11-29