Өөрөө унасан хүүхэд уйлдаггүй гэдэг л МАН-ын нарийн бичгийн дарга Ц.Бат-Энхэд тохиов. Тэрээр коронавирүсийн халдвар тархсан газраас буюу БНСУ-аас Японоор дамжин эх орондоо ирсэн юм. Халдвар тархсан газраас ирж байгаа иргэдийг тодорхой хугацаагаар тусгаарлан, үзлэг шинжилгээ хийж, халдвар авсан эсэхийг тогтоож байгаа. Гэтэл Ц.Бат-Энх УОК-ын энэхүү шийдвэрийг эсэргүүцэн, тусгаарлагдахаас татгалзаж, улмаар түүнийг албадан тусгаарлажээ.
Түүнийг ОБЕГ-ын Дэд дарга, Г.Ариунбуянгийн шийдвэрээр Жаргалантын сувилалд тусгай өрөө гарган байрлуулсан нь УОК-ын шийдвэрийг зөрчсөн, нэг хүнд давуу эрх олгосон үйлдэл болсон гэж үзэх ч хүмүүс байв.
Харин энэ асуудал МАН-ын дарга У.Хүрэлсүхийн чихэнд хүрч, Ц.Бат-Энхэд хариуцлага тооцохыг МАН-ын Ерөнхий нарийн бичгийн дарга Д.Амарбаясгаланд даалгаснаар МАН-ын генсек Д.Амарбаясгалан УОК-ын шийдвэрийг эсэргүүцсэн гэдэг үндэслэлээр нарийн бичгийн дарга Ц.Бат-Энхийг үүрэгт ажлаас нь чөлөөлөх шийдвэр гаргасан байна.
Ц.Бат-Энх нь “Эрдэнэт” үйлдвэрийн Хүний хөгжлийн асуудал хариуцсан захирлаар ажиллаж байгаад 2016 онд МАН-ын нарийн бичгийн даргаар сонгогдсон ажиллаж байсан юм.
АНХААРУУЛГА: Уншигчдын бичсэн сэтгэгдэлд манай сайт хариуцлага хүлээхгүй болно. Та сэтгэгдэл бичихдээ бусдын эрх ашгийг хүндэтгэн үзнэ үү.
0 cэтгэгдэлтэй