БШУ-ны сайд Л.Энх-Амгалан хоцрогдол болон тэгш бус байдлыг арилгах чиглэлд авч хэрэгжүүлэхээр төлөвлөж буй арга хэмжээний талаар “Улаан бал” нэвтрүүлэгт орох үеэрээ ийнхүү ярилаа. Хоцрогдлыг гурван жилийн хугацаанд арилгах бөгөөд сум, орон нутаг, сургуулийн онцлогт тааруулсан хоцрогдол арилгах хөтөлбөрийг хэрэгжүүлэхээр төлөвлөөд байна.
БШУ-ны сайд Л.Энх-Амгалан: Анги бүрт ямар бодитой хоцрогдол гарсныг үнэлж байна. Хоцрогдол зөвхөн ковидоос хойно биш ковидын өмнө ч үүссэн байсан.
Багш нар, хэрэгцээтэй хүүхдүүдийг компьютер, бүх сургуулиудаа шилэн кабельтай болоход 300 тэрбум төгрөг шаардлагатай. Аравдугаар сарын 1-нээс өмнө бүх сургуулийн интернетийн хурд хоёр дахин нэмэгдэнэ.
Багш нар сум, орон нутгийнхаа онцлогт тааруулж хоцрогдол нөхөх төлөвлөгөөг бичиж ирүүлсэн. Бид үүнд зориулаад 600 орчим сургуулийн багш нарт хоцрогдлыг нөхөх төслөө хэрэгжүүлэхэд шаардлагатай 5-20 сая төгрөгийн санхүүжилтыг Дэлхийн банктай хамтран шийдэж байна.
Мөн medle.mn платформ дээр 47 мянган багш нараасаа нэг цахим хичээлийг 100 мянган төгрөгөөр худалдаж авч байна. Өвөрхангайд байгаа Даваасүрэн, Ховдод байгаа Цэцэгсүрэн гээд сайн багш нарын хичээлийг амьдарч байгаа газраас үл шалтгаан цахимаар үзэж, хоцрогдлоо нөхөж болохгүй гэж.
1-12 дугаар ангид нийт 15000 хичээл орж байгаа. Нэг багш хэдэн ч хичээл оруулж болно гэхээр нэг багш дээд тал 20 сая төгрөгийн орлого олох боломжтой.
Мөн энэ намар гэхэд сургуулийн насны хүүхдүүдтэй, цахилгаангүй байгаа айлуудыг тогтой болгох ажлыг Эрчим хүчний яамтай хамтран хэрэгжүүлэхээр төлөвлөөд байна.
АНХААРУУЛГА: Уншигчдын бичсэн сэтгэгдэлд манай сайт хариуцлага хүлээхгүй болно. Та сэтгэгдэл бичихдээ бусдын эрх ашгийг хүндэтгэн үзнэ үү.
0 cэтгэгдэлтэй