Өнгөрсөн 2020 оны УИХ-ын сонгуулийн сурталчилгааны үеэр цагдан хоригдож, улмаар сонгуульд ялсан Ж.Эрдэнэбат ирэх пүрэв гарагт буюу гуравдугаар сарын 18-нд УИХ-ын гишүүний тангаргаа өргөж, бүрэн эрхээ баталгаажуулахаар болсон байна.
Ж.Эрдэнэбат УИХ-ын сонгуулийн 13 дугаар тойрог Сэлэнгэ аймгаас сонгогдсон бөгөөд өнгөрсөн есөн сарын турш хоригдож саяхан суллагдаад байгаа билээ. Энэ сарын 3-нд Ж.Эрдэнэбатад авсан таслан сэргийлэх цагдан хорих арга хэмжээг өөрчлөн, батлан даалтад гаргасан.
Энэ нь түүнд УИХ-ын гишүүний тангарагаа өргөж, бүрэн эрхээ баталгаажуулах боломжийг хуулийн хүрээнд олгосон гэсэн үг аж.
Эрүүгийн хэргийн анхан шатны шүүхээс Ж.Эрдэнэбатыг Ерөнхий сайдаар ажиллаж байхдаа эрх мэдэл, албан тушаалын байдлаа ашиглаж бусдад давуу эрх олгосон, гэмт хэрэгт зохион байгуулагчаар, бүлэглэж хамтран оролцсон гэм буруутайд тооцож, Эрүүгийн хуулийн 22.1 дүгээр зүйлийн 3 дахь хэсэгт зааснаар нийтийн албанд томилогдох эрхийг зургаан жилийн хугацаагаар хасаж, зургаан жил хорих ял оногдуулсан юм.
АНХААРУУЛГА: Уншигчдын бичсэн сэтгэгдэлд манай сайт хариуцлага хүлээхгүй болно. Та сэтгэгдэл бичихдээ бусдын эрх ашгийг хүндэтгэн үзнэ үү.
0 cэтгэгдэлтэй