ЭМЯ-аас коронавирүстай холбоотой цаг үеийн асуудлаар ээлжит мэдээллээ хийх үеэр ЗТХЯ-ны Хяналт шинжилгээ үнэлгээ дотоод аудитын газрын дарга М.Энхболд дараахь мэдээллийг өглөө. Тэрээр “Иргэний нисэхийн салбарт 2020 оны нэгдүгээр сарын 28-аас эхлэн БНХАУ-д нислэг үйлдэх ёстой байсан нэгдүгээр сарын гурван нислэг, хоёрдугаар сарын нийт 20 нислэг, гуравдугаар сарын хоёр нислэгийг өнөөдрийн байдлаар түр цуцлаад байна.
Мөн иргэний нисэхийн салбарт ажиллаж байгаа алба хаагчдад урьдчилсан зааварчилгаа өгч, эрүүл мэндийн үзлэгт хамруулан ажиллаж байна. Төмөр замын чиглэлээр ням гарагаас бусад гарагт БНХАУ руу галт тэрэг аялж байгаа.
Өнөөдрөөс эхлэн Бээжин-Улаанбаатар-Москва чиглэлийн 3, 4 дүгээр галт тэргийг ОХУ-ын хүсэлтийн дагуу зогсоож байгаа. Бусад галт тэргүүд бүгд аялж байна. Гэхдээ агаарын болон төмөр замын тээврээр Монгол Улсын иргэдийг БНХАУ руу аялахгүй байх заавар чиглэл өгч байна. Зайлшгүй ажлын шаардлагаар гарах бол Хил хамгаалах газраас зөвшөөрөл олгож ажиллаж байна.
Авто тээврийн чиглэлээр БНХАУ-тай хиллэдэг боомтуудыг нэгдүгээр сарын 27-ны өдрөөс эхлэн зорчигч тээврийн үйлчилгээг гаргахгүй. Мөн өнөөдрөөс эхлэн боомтуудыг түр хугацаагаар хаасан. Иймд зорчигчдыг зөвхөн агаарын болон төмөр замын тээврээр тээвэрлэхээр шийдвэрлэсэн” гэв.
АНХААРУУЛГА: Уншигчдын бичсэн сэтгэгдэлд манай сайт хариуцлага хүлээхгүй болно. Та сэтгэгдэл бичихдээ бусдын эрх ашгийг хүндэтгэн үзнэ үү.
0 cэтгэгдэлтэй