Буриад хөвүүд Бадам, Чагдар хоёрын хөгжөөнтэй түүхийн шинэ анги гарлаа. Хөл хориотой, хүйтэн зэврүүн энэ цагт монголчуудыг хөгжөөж буй хүүхэлдэйн уран бүтээлчид цувралын шинэ ангийг “шинэ жил”-ийн сэдвээр бүтээсэн байна.
Гэр бүлийн уран бүтээлчид одоогоор долоон цуврал хийсэн ба Бадам, Чагдар хоёрын түүхийг цуврал болгоход монголчуудын дэмжлэг ч мөн нөлөөлсөн гэнэ. Уг хүүхэлдэйг буриадуудаас илүү монголчууд цахим хуудаснаа олон мянгаар хуваалцаж, үзэж, сонирхсон байна.
Бид Улаан-Үд хотод суугаа Эрдэни Жалцановын гэр бүл Евгения Жалцановатай холбогдож, тэдний шинэ уран бүтээлийн талаар сонирхоход…
-“Саяхнаас нөхөр маань бяцхан өгүүлэмжтэй зургууд зурж эхэлсэн юм. Түүний зургийг миний эвлүүлгийн багахан чадвартай хавсран гүйцэтгэх санаа бидэнд төрсөн. Эцэст нь бидний санаанд ороогүй үр дүн гарсан нь гайхалтай. Ялангуяа монголын үзэгчид өндрөөр үнэлсэнд маш их баяртай байна” гэв.
Евгения урлаг судлаач, сэтгүүлч мэргэжилтэй ч бие дааж компьютер графикт суралцаад нөхрийнхөө уран бүтээлд хамтран ажилладаг байна. Тэрээр мөн “Бидний бүтээлийг тэсч ядан хүлээж байгаа олон үзэгчид бий. Хэдийгээр богино хэмжээний хүүхэлдэй ч тодорхой цаг хугацаа орно. Гэхдээ бид улам шуурхай хийхийг хичээж байгаа гэдгийг монгол үзэгчдэд дамжуулаарай ” хэмээн хүслээ.
М.Саруулсайхан
АНХААРУУЛГА: Уншигчдын бичсэн сэтгэгдэлд манай сайт хариуцлага хүлээхгүй болно. Та сэтгэгдэл бичихдээ бусдын эрх ашгийг хүндэтгэн үзнэ үү.
0 cэтгэгдэлтэй