Дэлхийн эрүүл мэндийн байгууллагын Европын бүс нутгийн товчооны захирал Ханс Клюге коронавируст халдвар “COVID-19”-ийн халдварын тархалтыг зогсоохгүй юм бол хоёр дахь давалгаа нь эхэлж, өмнөхөөсөө ч илүү аймшигтай байх болно гэж онлайн мэдээллийнхээ үеэр онцолжээ.
“Хоёр дахь давалгаанаас зайлсхийх арга байхгүй, ихэнх улс орнууд хөл хорионы дэглэмээ цуцалж байгаа нь “COVID-19”-ийн халдвар дахин гарах аюул эхэлнэ, энэ нь өмнөхөөсөө илүү аюултай байх болно” гэж Х.Клюге хэлсэн байна. Тэр бас “Оны эхний үеийг бодвол өнөөдөр бидний нөхцөл байдал тийм ч сайн биш байна. Тэгээд ч одоо бидэнд COVID-ийн эсрэг вакцин ч байхгүй хэвээр байна” гэжээ.
Оросын мэргэжилтнүүд ч бас коронавирусийн шинэ давалгаа гарахыг үгүйсгэхгүй байгаа. ОХУ-ын Мэргэжлийн хяналтын газрын тэргүүн Анна Попова коронавирусийн хоёр дахь давалгаа магадгүй намар гарч мэднэ гэжээ. Дэлхийн эрүүл мэндийн байгууллага энэ өвчнийг гуравдугаар сарын 11-нд цар тахал хэмээн зарласан. Өнөөдрийн байдлаар дэлхий дахинаа коронавирусийн халдвараар 6.5 сая хүн өвчилж 388 гаруй мянган хүн нас бараад байна.
АНХААРУУЛГА: Уншигчдын бичсэн сэтгэгдэлд манай сайт хариуцлага хүлээхгүй болно. Та сэтгэгдэл бичихдээ бусдын эрх ашгийг хүндэтгэн үзнэ үү.
0 cэтгэгдэлтэй