![](https://mlife.mn/wp-content/uploads/2020/05/nbmvpt_C3A433CB-3599-4D7E-B189-D5589DD10B52_x974.jpg)
Эрүүл мэндийн яамнаас коронавируст халдварын нөхцөл байдлын талаарх ээлжит мэдээллээ хийлээ. Энэ үеэр ХӨСҮТ-ийн захирал Д.НЯМХҮҮ дахин таван хүнээс коронавирусийн халдвар илэрч, батлагдсан тохиолдлын тоо 191 болсныг хэллээ.
Тэрээр “Өчигдөр ХӨСҮТ-ийн гурван лабораторид 715 хүнд хийсэн шинжилгээнээс 710 хүний хариу сөрөг гарлаа. Таван хүнээс коронавирусийн халдвар илэрлээ. Дөрвөн оюутан болон ОХУ-ын ачаа тээврийн жолоочоос давтан шинжилгээгээр коронавируст халдвар илэрсэн.
Коронавируст халдварын батлагдсан 191 тохиолдлоос 70 хүн эдгэлээ. Өнөөдөр ХӨСҮТ-өөс таван хүн эдгэрэн гарч байна. ХӨСҮТ-д 121 хүн эмчлүүлж байгаагаас хүндэвтэр 15 хүн байна. Эдгэж буй хүмүүсийн ихэнх нь оюутнууд.
ОХУ-ын хүнс зөөдөг ачаа тээврийн жолооч зургадугаар сарын 3-нд орж ирснийг сэжигтэй тохиолдол гэж үзэн, Сэлэнгэ аймагт тусгаарласан байсан. Түүнийг өнөөдөр ХӨСҮТ-д татан авчирч, эмчилгээг эхлээд байна” гэв.
Мөн тэрээр олимпийн аваргууд, медальтнууд нийлэн ХӨСҮТ-ийн хамт олонд 12.5 сая төгрөг хандивлаж буйд талархаж байгаагаа илэрхийлсэн юм.
АНХААРУУЛГА: Уншигчдын бичсэн сэтгэгдэлд манай сайт хариуцлага хүлээхгүй болно. Та сэтгэгдэл бичихдээ бусдын эрх ашгийг хүндэтгэн үзнэ үү.
0 cэтгэгдэлтэй