Энэтхэгийн хойд хэсэгт орших нэгэн эмнэлгийн нярайн эрчимт эмчилгээний тасагт гал гарч улмаар 10 нярай амь үрэгджээ. Тодруубал, Уттар Прадеш мужийн Жанси хотын эмнэлэгт Баасан гарагийн орой гал гарч, эрчимт эмчилгээний тасагт эмчлүүлж байсан 55 нярайгаас 10 нь амь үрэгдсэн байна.
Одоогийн байдлаар галаас аварсан нярай хүүхдүүдийн 16 нь шархадсан бол бусад хүүхдүүдийн биеийн байдал хэвийн байна.
Юунаас болж гар гарсан нь тодорхойгүй байгаа ба дэд сайд Бражеш Патхак гал гарсан эмнэлэгт очиж хүүхдүүдийн ар гэрийнхэнтэй уулзахдаа “Бид энэ эмгэнэлт явдлын буруутныг олж, хатуу арга хэмжээ авна. Засгийн газар энэ хүнд хэцүү үед хохирогчдын гэр бүлтэй хамт байх болно” гэж хэлжээ.
Гал сөнөөгчдийг очиход тасаг хэдийн галд автсан байжээ. Гал гарснаас хойш 30 минут орчмын дараа аврах ажиллагаа эхэлсэн тул үлдсэн хүүхдүүдийг аврахад хэтэрхий хожимдсон гэж гэрчүүд мэдэгдсэн байна. Мөн эмнэлэгт байсан эцэг эхчүүд галын дохиолол дуугараагүй, эмнэлгийн ажилтнууд тасгаас утаа савсаж байхад л ямар нэгэн зүйл болсныг мэдсэн гэжээ. Хүүхдээ алдсан эцэг Нареш Кумар “Хэрэв аюулгүй байдлын дохиолол ажилласан бол бид илүү хурдан очиж олон хүүхдийн амийг аврах байсан” гэсэн байна.
АНХААРУУЛГА: Уншигчдын бичсэн сэтгэгдэлд манай сайт хариуцлага хүлээхгүй болно. Та сэтгэгдэл бичихдээ бусдын эрх ашгийг хүндэтгэн үзнэ үү.
0 cэтгэгдэлтэй