Шинэ коронавирус нь хуванцар болон ган (stainless steel) хийцийн гадаргуу дээр гурав хүртэл хоног амьдардгийг эрдэмтэд туршилтаар тогтоожээ. Эрдэмтдийн судалгааны тайлан “New England Journal of Medicine” сэтгүүлд нийтлэгдсэнийг CNN онцолжээ.
Судалгааны үр дүнгийн талаар “Covid-19 өвчин үүсгэгч вирус нь агаар дахь усан дусалд гурван цаг тэсдэг бол ган (stainless steel) болон хуванцар хийцтэй гадаргуу дээр 72 цаг хүртэл тэсвэрлэдэг. Зэс гадаргуу дээр дөрвөн цаг, хатуу цаасан (кардон) гадаргуу дээр 24 цаг хүртэл тэсэж байна” гэжээ.
Үүнээс үндэслэн Covid-19-өөр өвчилсөн өвчтөнүүдийг эмчилж байгаа эмнэлгийн ажилтнууд маш анхаарал болгоомжтой байж, ариутгал, халдваргүйжүүлэлтийг байнга хийх шаардлагатайг судлаачид анхааруулжээ.
2002 онд дэгдэж байсан SARS өвчний SARS-CoV-1 вирус нь металл, шил, хуванцар зэргийн гадаргуу дээр ариутгаагүй тохиолдолд ес хүртэл хоног тэсвэрлэж байжээ.
Коронавируст халдвараас урьдчилан сэргийлэх зорилгоор Мэргэжлийн хяналтын байгууллагаас Хаан, Худалдаа хөгжил, Голомт, Улаанбаатар, Капитрон, Хас, Төрийн банк гэсэн арилжааны 7 банкинд албан бичиг хүргүүлжээ. Мөн Үндэсний дата төвд.
Тус албан бичигт мөнгөний АТМ машин болон төрийн үйлчилгээний цахим машины товчлуурыг цэвэрлэж халдваргүйжүүлэх, бүхээг бүрт гар халдваргүйжүүлэх уусмал, ковид-19-өөс сэргийлэх, гараа угаах талаарх санамж, зөвлөмжүүдийг байршуулан ажиллах талаар дурджээ.
Улсын хэмжээнд мөнгөний АТМ машин 717, төрийн үйлчилгээний цахим машин 84 байдаг байна.
АНХААРУУЛГА: Уншигчдын бичсэн сэтгэгдэлд манай сайт хариуцлага хүлээхгүй болно. Та сэтгэгдэл бичихдээ бусдын эрх ашгийг хүндэтгэн үзнэ үү.
0 cэтгэгдэлтэй