Монгол Улсын Засгийн газар, Улсын онцгой комиссын шийдвэрийн дагуу одоогийн байдлаар нийт 731 иргэн эх орондоо ирээд байна. Сөүл-Улаанбаатар чиглэлийн ОМ-302 дугаарын захиалгат нислэгээр 244, Берлин-Москва-Улаанбаатарын ОМ-136 нислэгээр 231, Токио-Улаанбаатар чиглэлийн нислэгээр 256 иргэн ирээд байгаа юм.
Эдгээр иргэдээс гурван хүн коронавирүст халдвараар өвчилсөн болохыг ЭМЯ-аас албан ёсоор мэдээлсэн. Тэд 37-60 гаруй насны эмэгтэйчүүд ба хоёр нь БНСУ-д эмнэлгийн байгууллагаар үйлчлүүлсэн иргэн байна.
Захиалгат нислэгээр ирсэн иргэдийг ХӨСҮТ, Цэргийн төв эмнэлэг, ОБЕГ-ын харьяа Жаргалантын ам, Энх саран сувилал, Наранбулаг амралтын газар зэрэгт хуваарилан тусгаарлаад байгаа. БНСУ-аас ирсэн хоёр иргэнд тусгаарлагдсан хойно шинэ тэмдэг илэрсэн бол Берлиний нислэгээр ирсэн иргэн нислэгийн явцад 37.6 хэм хүртэл халуурсан ба Хилийн мэргэжлийн хяналтын албаныхан шуурхай арга хэмжээ авч ХӨСҮТ-д шилжүүлжээ.
БНСУ-аас иргэдээ авчрах ажиллагаанд явсан Буянт-Ухаа дахь хилийн мэргэжлийн хяналтын албаны эрүүл ахуй халдвар хамгааллын хяналтын улсын байцаагчид болон нисэх багийнхан бүгд журмын дагуу тусгаарлагдсан гэж Мэргэжлийн хяналтын байгууллагаас мэдээллээ.
АНХААРУУЛГА: Уншигчдын бичсэн сэтгэгдэлд манай сайт хариуцлага хүлээхгүй болно. Та сэтгэгдэл бичихдээ бусдын эрх ашгийг хүндэтгэн үзнэ үү.
0 cэтгэгдэлтэй