Хэт боловсруулсан хоол хүнс эрт нас барах эрсдэлийг нэмэгдүүлдэг болохыг Сан Паулогийн их сургуулийн эрдэмтэд тогтоожээ. Тэдний бүтээл American Journal of Preventive Medicine сэтгүүлд нийтлэгдсэн байна.
Бразилд 2019 онд 30-70 насны 57,000 хүн эрт нас барсан нь хэт өндөр боловсруулсан хүнсний хэрэглээтэй холбоотой байна. Энэ нь тус улсад жил бүр нас дутуу нас баралтын 10 гаруй хувийг эзэлж байна.
Ийм бүтээгдэхүүн нь зүрх судасны тогтолцооны өвчний хөгжилд хувь нэмэр оруулдаг бөгөөд энэ нь эдгээр эрт нас баралтад нөлөөлж буй гол хүчин зүйлүүдийн нэг ажээ.
“Чихрийн шижин, хорт хавдар, таргалалт, бөөрний архаг өвчин ч энэ үйл явцад нөлөөлж болзошгүй. “Хэт боловсруулалт” хийсэн бүтээгдэхүүн нь илүү хиймэл нэмэлтийг агуулдаг.
Бэлэн гоймон, хот-дог, талх, бялуу, хиам, хөлдөөсөн пицца, хийжүүлсэн ундаа, жигнэмэг ихэвчлэн энэ ангилалд багтдаг” гэж эрдэмтэд тайлбарлажээ.
Судалгааны явцад судлаачид ижил сэдвээр хийсэн бусад шинжлэх ухааны ажилд дүн шинжилгээ хийсэн байна. Энэ нь их хэмжээний боловсруулсан хоол иддэг хүмүүсийн нас барах эрсдэлийг харьцангуй бага иддэг хүмүүстэй харьцуулсан судалгаа аж.
Зохиогчид энэ загварыг Бразилийн хүн ам болон өндөр боловсруулсан хүнсний хэрэглээний түвшинд ашигласан. Үүнээс тэд эдгээр хоолыг бага идвэл эрт нас барахаас урьдчилан сэргийлэх боломжтой байсныг тооцоолжээ. Тэдний тооцоогоор Бразилчуудын дөрөвний нэг орчим нь өдөр тутмын илчлэгийнхээ 50 хүртэлх хувийг өндөр боловсруулсан хоол хүнснээс авдаг байна. Хэрэв Бразилийн бүх насанд хүрэгчид үүнийг 23% хүртэл бууруулбал тус улсад жил бүр эрт нас баралт 20,000-аар буурах боломжтой гэнэ.
Эрдэмтэд бусад оронд энэ үзүүлэлт хамаагүй өндөр байж магадгүй гэж үзэж байна. Жишээлбэл, АНУ-д өдөрт хэрэглэж буй илчлэгийн 57 орчим хувийг хэт их боловсруулсан хоол хүнс эзэлдэг. Үүний үндсэн дээр АНУ-д хэт их боловсруулсан хүнсний бүтээгдэхүүнээс болж эрт нас барах тохиолдол өндөр байна гэж үзжээ.
АНХААРУУЛГА: Уншигчдын бичсэн сэтгэгдэлд манай сайт хариуцлага хүлээхгүй болно. Та сэтгэгдэл бичихдээ бусдын эрх ашгийг хүндэтгэн үзнэ үү.
0 cэтгэгдэлтэй