Засгийн газрын ээлжит хуралдаанаар “Эрдэнэс Тавантолгой” компанид онц дэглэм тогтоож, Бүрэн эрхэт төлөөлөгч томилсон. Тус компанийн гүйцэтгэх захирал Б.Ганхуягийг үүрэгт ажлаас нь чөлөөлсөн байдаг.
Түүнчлэн “Эрдэнэт Тавантолгой” компанийн худалдан авалтын хэлтсийн дарга Б.Отгонжаргалыг эрх мэдэл, албан тушаалаа ашигласан, мөн өөрийн хамаарал бүхий компанид даваа байдал олгосон, үндэслэлгүй хөрөнгөжсөн хахууль авсан байж болзошгүй гэх хэрэгт мөрдөн шалгалтыг цагдаагийн байгууллагаас эхлүүлжээ.
Мөрдөн шалгах явцад Б.Отгонжаргалын хамаарал бүхий этгээдийн гэрээс их хэмжээний бэлэн мөнгө илэрснийг хурааж авч, “Бенз Жи-500” тээврийн хэрэгслийг битүүмжилсэн байна.
Ерөнхий сайд Л.Оюун-Эрдэнэ өнгөрсөн хавар хэвлэлийнхэнд мэдээлэл хийхдээ нүүрсний экспортоос хулгай хийдэг бүлэглэл байгааг шалгахаар болсноо мөн тэдний нэг нь УИХ-ын гишүүн А.Адъяасүрэн болохыг нэр цохож зарласан билээ.
Нүүрсний гэх энэ хэрэгт олон хүн холбогдож болзошгүй, “Эрдэнэс Тавантолгой”-н гүйцэтгэх захирал Б.Ганхуягийг үүрэгт ажлаас нь чөлөөлөхгүй байхыг УИХ-ын нэр бүхий олон гишүүн Ерөнхий сайдаас гуйсан гэх мэдээлэл ч цацагдаад байна.
АНХААРУУЛГА: Уншигчдын бичсэн сэтгэгдэлд манай сайт хариуцлага хүлээхгүй болно. Та сэтгэгдэл бичихдээ бусдын эрх ашгийг хүндэтгэн үзнэ үү.
0 cэтгэгдэлтэй