УИХ-ын гишүүн Ц.Анандбазартай холбоотой хэргийг Нийслэлийн прокурорын газраас хэрэгсэхгүй болгожээ.
Түүнийг охид эмэгтэйчүүдэд бэлгийн дарамт үзүүлдэг байсан гэх хэрэгт 2021 оны дөрөвдүгээр сараас эхлэн шалгаж байгаа билээ.
Прокурорын байгууллагаас энэхүү хэргийн тухай тодруулахад “УИХ-ын гишүүн Ц.Анандбазарт холбогдох хэргийг хэрэгсэхгүй болгосон нь үнэн” гэлээ. Гэхдээ уг хэрэг ямар үндэслэлээр хэрэгсэхгүй болсон нь тодорхойгүй байна.
Албан бус эх сурвалжийн мэдээлснээр, хохирогч гэх эмэгтэй өгсөн мэдүүлгээсээ буцсанаар хэрэг ийнхүү хаагдах шалтгаан болсон байж магадгүй аж.
2021 оны дөрөвдүгээр сард нэр бүхий эмэгтэйчүүд Ц.Анандбазарын бэлгийн дарамтад өртөж байсан тухайгаа дэлгэж, цагдаагийн байгууллагад гомдол гаргасан юм. Зарим нь бүр 1000 эмэгтэйг дарамталсан гэж бичиж байсан билээ. Түүний нэр холбогдсон уг хэрэг ямар нэг шийдвэргүй жил гаруйн хугацааг үдсэн.
Ц.Анандбазарыг анх олон эмэгтэйд бэлгийн дарамт үзүүлсэн гэх мэдээлэл нийгэмд цацагдсанаас хойш Ц.Анандбазарт намаас нь хариуцлага тооцсон. МАН-ын Хяналтын ерөнхий хорооноос Ц.Анандбазарт ёс зүйн хариуцлага тооцсоноор түүнийг намын болон парламент дахь МАН-ын бүлгийн үйл ажиллагаанд оролцохыг хязгаарласан.
АНХААРУУЛГА: Уншигчдын бичсэн сэтгэгдэлд манай сайт хариуцлага хүлээхгүй болно. Та сэтгэгдэл бичихдээ бусдын эрх ашгийг хүндэтгэн үзнэ үү.
0 cэтгэгдэлтэй