Энэ намбалаг бүсгүйг үзэгчид “Голланд сарнай“ киноны дүрээр нь сайн таних болсон. Гэсэн ч түүнийг УИХ-ын гишүүн Б.Саранчимэгийн дараа Үндэсний цэцэрлэгт хүрээлэнгийн даргаар, НИТХ-ын төлөөлөгчөөр ажиллаж байсан гэдгийг зарим нь мэдэхгүй байж болох. Ц.Алтанцэцэг хатагтай үеийнхнээсээ жавхаалаг, толигор байдгийн нууц нь тэрээр залуу халуун насандаа урлагт тэр дундаа бүжигтэй ойрхон явсных биз.
Тэрээр СЭЗДС-ийн дэргэдэх алдарт “Улаан сарнай” хамтлагийн ууган гишүүдийн нэг. 2013 онд нээлтээ хийсэн “Голланд сарнай“ уран сайхны кинонд гавьяат жүжигчин Д.Жаргалсайхан, Ж.Оюундарь, жүжигчин Б.Мишээл нарын хамт тоглоход нь түүнийг “Хэзээний жүжигчин хүн мэт“ хэмээн үнэлж байсан гэх юм билээ.
Харин тэрээр “Би ч бас амьдралдаа алдаж оносон, хань ижлээсээ хагацаж салсан хүн. Амьдралын жаргал зовлонг өөрийн биеэр туулж үзсэний хувьд тухайн асуудлыг мэдэрч, илэрхийлэх тал дээр харьцангуй гайгүй байсан болов уу“ гэсэн даруухан хариултыг өгсөн удаатай. Тус кинонд Байгаль гэх өрх толгойлсон эмэгтэйн дүрийг бүтээхийн зэрэгцээ продюссерээр нь ажилласан Ц.Алтанцэцэг өдгөө нөхөр, гурван хүүхдийн хамт амьдардаг. Түүнийг киноныхоо продюссерээр ажиллахад янз бүрийн асуудалтай холбож “хардах” хүн цөөнгүй байсан.
Харин тэрээр “Би үнэтэй хаусанд амьдардаг, эрх мэдэлтэй том дарга биш. Гэхдээ өөрийнхөө олсон жаахан мөнгийг нийгэмд хэрэгтэй зүйл бүтээж, хүмүүсийн сайн сайхны төлөө зарцуулахад харамсах юм алга. Нэгэнт л ард иргэдийнхээ төлөөлөл болно гэж сонгогдсон учраас тэдэнтэйгээ хамт байж, аль болох хэрэгтэй зүйл хийх ёстой. Тийм болохоор би энэ киноны продюссерээр ажилласандаа баяртай байгаа” гэх хариултыг өгч байсан юм.
АНХААРУУЛГА: Уншигчдын бичсэн сэтгэгдэлд манай сайт хариуцлага хүлээхгүй болно. Та сэтгэгдэл бичихдээ бусдын эрх ашгийг хүндэтгэн үзнэ үү.
0 cэтгэгдэлтэй