Өмнөговь аймаг уул уурхайн том бүс нутаг. Тэр хэрээр улсын төсөвт хамгийн их хөрөнгө мөнгийг төвлөрүүлдэг сайн талтай ч бас хамгийн их төсвийг үрэн таран хийдэг учир иргэдийн гомдол тасардаггүй. Ганцхан жишээ татъя. Өнгөрсөн намар болсон орон нутгийн сонгуулийн үеэр сэтгүүлчдийг тус аймагт ажиллах үеэр иргэдээс олон мэдээлэл ирсний нэг нь “Том ах” гэх “Ажнай”-н Д.Бат-Эрдэнийн тухай юм. Түүнийг Өмнөговь аймгийн “эзэн” гэж хэлдэг, ойлгодог хүн цөөнгүй.
“Ажнай” Бат-Эрдэнэ гэх хүнтэй ойр байж чадвал, нэг ёсондоо “сайн дүү” нь болж чадвал хамаг ажил нь бүтдэг тухай нутгийнхан нь ярилцдаг. Өөрийн нэр нүүрээ нуулгүй энэ тухай илчилсэн хүн бол иргэн Д.Сандаг байв. Бид иргэн Д.Сандагтай ярилцсаны дараа олон хүн зориг орж, маш их баримтыг илчилсээр байлаа. Иргэдийн аманд нэр нь хамгийн олон дурдагдсан хүний нэг нь Н.Адъяацэрэн. Өмнөговь аймагт ажиллаж байх үед бидний мэдээлэл авах эрхэд бүдүүлгээр халдаж, гүтгэж байсан, мөн Засгийн газар миний үгээр хөдөлнө хэмээн сэтгүүлчдийг элдвээр доромжилж байсан Н.Адъяацэрэн гэгч эмэгтэй аймгийн Засаг даргын тамгын газарт ажилладаггүй хэрнээ байнга эргэлдэж, бүр ажилтан шиг нь байдаг нэгэн аж. “Ажнай” Д.Бат-Эрдэнийн ойрын хүн тэрээр Тавантолгой ХК-ийн ТУЗ-ийн нарийн бичгийн даргын алба хашдаг ч төрийн ажил албанд дэндүү хутгалддаг нь гайхалтай.
Ажлаа хийж яваа сэтгүүлчид рүү орилж хашхирч, улайран дайрсан нь нутгийн иргэдийн хэлснээр “Ажнай” Д.Бат-Эрдэнэтэй тун ойр шадарладаг, гарын хүн нь гэж бардсаных байсан бололтой. Мэргэжлийн биш атлаа хэвлэлийн төлөөлөгчийг нь хийдэг гэх энэ эмэгтэй үнэндээ “том ах”-ынхаа даалгавраар л ажилладаг гэдгийг олон хүн баталж байна. Ингэж “том ах”-аа хамгаалж олон нийт рүү “хуцсан”-ыхаа төлөө тэрээр багагүй шагнал ч авдаг аж.
Хамгийн сонирхолтой нь энэхүү шагналаа тэрээр “Ажнай” Бат-Эрдэнээс бус Өмнөговь аймгийн төсвөөс гаргуулж авдаг болохыг дараах баримтууд илчилж байна. 2020-2024 онд Өмнөговь аймгийн Засаг даргаар Р.Сэддорж, ИТХ-ын даргаар Н.Энхбат нар ажиллаж байсан. Тэд хоёулаа “Ажнай” Бат-Эрдэнийн “сайн дүү” нар. Хоёулаа анх “том ах”-ынхаа туслахаар ажлын гараагаа эхэлж байсан бөгөөд үргэлж ногоон гэрлээр албан тушаал ахиж ирсэн. Өнөөдөр Р.Сэддорж нь УИХ-ын гишүүн, Н.Энхбат нь Өмнөговь аймгийн Засаг дарга болоод байгаа. Товчхондоо “Ажнай” Бат-Эрдэнэ өөрийнхөө гар хөлийг бэлдээд, өөрөө хөшигний ард, хилийн чанадаас утсан хүүхэлдэйнүүдээ удирдаад сууж байгаа гэсэн үг. Харин тэд Өмнөговь аймгийг хөгжүүлэх, өмнөговьчуудын хүртэх ёстой төсөв мөнгийг ахынхаа заавар тушаалаар хувааж идсээр байгаа нь өрөвдөлтэй.
Энэ удаа бид сэтгүүлчдийг элдвээр хэлдэг Н.Адъяацэрэн гэгч эмэгтэйг Р.Сэддорж, Н.Энхбат нар төсвийн мөнгөөр хэрхэн эрхлүүлдгийг дэлгэж байна. Р.Сэддорж өнгөрсөн онд УИХ-ын гишүүн болохын тулд хэвлэл мэдээллийн зардалд 589,200,000 төгрөг зарцуулжээ. Гэхдээ энэ мөнгийг тэрээр өөрийн халааснаас биш Өмнөговийн төсвөөс гаргасан байна. Үүнээс гадна “Түвдэнгийн бор интернэшнл” ХХК болон “Говь мэдээллийн хөтөч” ХХК мөн “Алтан нутгийн мэдээ” сонин бүгд дээр дурдсан Н.Адъяацэрэнд хамааралтай. “Түвдэнгийн бор интернэшнл” ХХК-ийн 90 хувийг “Ажнай” Д.Бат-Эрдэнэ эзэмшдэг бол “Алтан нутгийн мэдээ” сонины толгой компани нь “Түвдэнгийн бор интернэшнл” ХХК болохыг улсын бүртгэлээс харж болно. “Алтан нутгийн мэдээ” сонины эрхлэгчээр өнөөх Н.Адъяацэрэн ажилладаг ба “Говь мэдээллийн хөтөч” ХХК-ийн үүсгэн байгуулагч, захирлаар нь мөн ажилладаг. Ил харагдаж байгаагаас энэ 3 компаниараа дамжуулан Өмнөговь аймгийн Засаг даргын Тамгын газар болон Иргэдийн төлөөлөгчдийн хуралтай гэрээ хийж, хэвлэлийн гэрээний мөнгө авдаг. Үнэн хэрэгтээ сэтгүүлчдийг шантааж хийдэг хэмээн аархдаг тэрээр өөрөө бол Өмнөговийн төсвөөс баруун, зүүнгүй авдаг нь ийнхүү баримтаар нотлогдож байна.
Зөвхөн сүүлийн хэдэн жишээ хэлэхэд, 2024 оны 03 дугаар сарын 20-ны өдөр “Түвдэнгийн бор интернэншл” ХХК-ийн 5585….. данс руу 9,900,000, 2024 оны 05 дугаар сарын 29-ний өдөр ахиад л 9,900,000 төгрөг “гэрээгээр хэвлэл мэдээлэл” утга бүхий мөнгө шилжүүлжээ.
Гэтэл ердөө сарын дараа дахиад л 2024 оны 07 сарын 23-ны өдөр Өмнөговь аймгийн Иргэдийн төлөөлөгчдийн хурлаас А/83 тоот захирамжаар 5,600,000 төгрөг мөн л дээрх дансаараа авчээ. Ингээд зогсохгүй “Говь мэдээллийн хөтөч” ХХК-ийнхаа нэрээр 2024 оны 04 дүгээр сарын 09-ний өдөр 6,300,000 төгрөг авчээ. Тэгвэл сүүлдээ энэ мөнгөө ч чамлаж эхэлсэн бололтой “Нутгийн хишиг” хөтөлбөрийн сэтгүүл хийх нэрээр төсвийн мөнгөнөөс 71,900,000 төгрөгийн үнийн дүн бүхий тендерийг авчээ. Ийнхүү “том ах”-ыгаа хамгаалж, ажлаа хийж яваа сэтгүүлчдийг элдвээр дууддаг түүний хэдхэн баримтыг дэлгэхэд ийм байна. Зөвхөн төсвийн мөнгөнөөс ганцхан жилийн дотор 100 гаруй сая төгрөг “тоншдог” болохоор ингэж том дуугарах нь ч аргагүй байх.
Хамгийн харамсалтай нь, төсвийн мөнгөнд хяналт тавьж, зүй зохистой ажилд зарцуулах эрх мэдэл бүхий Р.Сэддорж, Н.Энхбат нар түүний энэ увайгүй үйлдлийг өөгшүүлж байгаагийн цаана “Ажнай” Д.Бат-Эрдэнэ үүрэг өгөөд сууж байдаг гэж хардахаас өөр аргагүй болж байна. Учир нь “Түвдэнгийн бор интернэшнл” ХХК -ийн 90 хувийг “Ажнай” Д.Бат-Эрдэнэ эзэмшдэг бөгөөд хувийнхаа телевиз, радиог ажиллуулахад зарцуулах мөнгөө халааснаасаа бус Өмнөговь аймгийн төсвөөс гаргаж, өөрийнхөө “утсан хүүхэлдэй”-г эрхлүүлсээр байгаа нь өрөвдөлтэй.
Үргэлжлэл бий…
АНХААРУУЛГА: Уншигчдын бичсэн сэтгэгдэлд манай сайт хариуцлага хүлээхгүй болно. Та сэтгэгдэл бичихдээ бусдын эрх ашгийг хүндэтгэн үзнэ үү.
1 сэтгэгдэлтэй
Arnavutköy noktasal su kaçağı tespiti Sonsuz Teşekkürler: Bizi büyük bir dertten kurtardılar. Sonsuz teşekkürler! http://alabamalighthouses.com/?p=23134